Policia e Kosovës ndërmori një operacion në veri, për të zbatuar marrëveshjen për targa të përkohshme. Ish-kryeministri i Serbisë, Zoran Zhivkovic, ka thënë se çështja e reciprocitetit me targat është pjesë e marrëveshjes që presidenti Aleksander Vuçiç e ka nënshkruar me Kosovën para pesë vitesh. Duke analizuar situatën, ai shprehet se gjithçka që po ndodh aktualisht është “pasojë e veprimeve të Vuçiçit”. “Prandaj ata tashmë po përpiqen ta luajnë shpëtimtarin e serbëve”, ka thënë ai.
Nga dita e djeshme, Republika e Kosovës ka filluar implementimin e reciprocietetit të targave. Makinat me targa të Serbisë do të mund të futen në Kosovë, vetëm pasi të kenë hequr ato serbe dhe të kenë vendosur tabelat e Republikës së Kosovës.
Forcat speciale të Kosovës mësynë mëngjesin e së hënës në pikat kufitare me Serbinë, për shkak të vendimit të qeverisë së Prishtinës, për të vendosur reciprocitetin për targat e automjeteve serbe që hyjnë në territorin e Kosovës.
Kjo ka shkaktuar radhë të gjata automjetesh në anën serbe të kufirit, dhe një protestë të banorëve lokalë. Ambasada e Shteteve të Bashkuara të Amerikës në Prishtinë, ka kërkuar që Kosova dhe Serbia të përmbahen, dhe t’i ulin tensionet menjëherë.
“Ne i bashkohemi Bashkimit Evropian në thirrjen ndaj Kosovës dhe Serbisë, që të përmbahen nga veprimet e mëtejshme të njëanshme dhe t’i ulin tensionet –menjëherë, pa vonesë”, thuhet në reagimin e Ambasadës Amerikane.
