Kryeministri Edi Rama dhe ambasadori i BE-së, Luigi Soreca kanë zhvilluar sot një konferencë të përbashkët në kuadër të ‘Ditës së Evropës’.
Gjatë fjalës së tij, Rama foli edhe për procesin e hapjes së negociatave me BE-në. Kreu i qeverisë tha se për të vijuar në rrugën e anëtarësimit në BE, ai është i gatshëm t’i çojë një mesazh uniteti kombëtar Brukselit.
Kryeministri deklaroi se është i gatshëm të ulet në një tryezë me presidentin Meta dhe kryedemokratin Lulzim Basha.
“Ne po përgatitemi për të vijuar me integrimin. Falënderoj miqtë tanë në Bruksel që po na qëndrojnë pranë në eksperiencën e negocimit të anëtarësimit. Tashmë që negociatat janë hapur dhe kërkohet përgatitje, po ju them që plani i punës është detajuar për muajt në vijim. Qeveria mban peshën kryesore por këtu duhen të gjithë aktorët të kontribuojnë, ne kemi vullnet të ulemi në një tryezë me Presidentin e Republikës, kryetarin e opozitës dhe përfaqësues të institucioneve të pavarura. Le të jetë kjo tryezë ku do të shprehim vullnetin e përbashkët, ku secili të bëjë detyrat e veta, pa iu imponuar tjetrit por për të dhënë edhe një mesazh të fortë të unitetit kombëtar. Në këtë proces që të gjithë e duam integrimin e Shqipërisë në BE. Jemi gati të ulemi me Presidentin, opozitën parlamentare dhe jashtëparlamentare, të mundemi të japim një kontribut të gjithë”, tha ai.
