Me zhvillimet e reja në UEFA dhe në FIFA dhe me kandidaturat e përbashkëta të disa shteteve që po bëhen gjithmonë e më shumë një trend në rritje, ndoshta një turne elitar mund të prekë dhe kufijtë tanë.
Presidenti i Federatës së Kosovës të Futbollit, Agim Ademi, e ka tejkaluar paksa fantazinë me dëshirën e shprehur, që do të marrë formë zyrtare pas disa kohësh. Shqipëria ka aplikuar disa herë për të mikpritur evente madhore në Futbollin Europian, duke synuar kupa dhe Superkupa, por asnjëherë kandidatura jonë nuk ka qenë e suksesshme.
Kështu, në një prononcim për “RTK”, hidhet ideja e mbajtjes së një Europiani në trevat shqiptare. Flitet për takimet e evenimentit më madhor, që do të zhvilloheshin në Shqipëri, Kosovë, Maqedoni dhe Mali i Zi. Në dukje një ide e mrekullueshme kjo e Ademit, por që sigurisht ka shumë vështirësi në realizimin e saj.
“Në një të ardhme planifikojmë të aplikojmë në UEFA-n për të marrë organizimin e ndonjë ngjarje të madhe si Evropiani në Kosovë, Shqipëri, Maqedoni dhe eventualisht edhe në Mal të Zi”, u shpreh Ademi. Ai shtoi gjithashtu se shpreson që në federatën maqedonase të futbollit, presidenti të jetë me etni shqiptare, në zgjedhjet që do të mbahen pas pak ditësh.
