Kryetari i Partisë Demokratike, Lulzim Basha veç sulmeve ndaj mazhorancës, premtimeve për një të ardhme më të mirë, pati edhe një ndjesë sot ndaj shqiptarëve gjatë fjalës së tij në mbyllje të protestës.
Teksa akuzoi Ramën se ka blerë pronarët e mediave, Basha kërkoi “ndjesë në emër të Partisë Demokratike për ata që u bënë milionerë në pushtetin e së djathtës mbi djersën dhe gjakun e shqiptarëve të ndershëm”.
Duket se Basha kërkon të fitojë gjithnjë e më shumë terren në të djathtën, duke bërë autokritika, teksa shfaqet si “i dënuari” që synon të përfitojë nga pendesa.
“Edi Rama ka kapur dhe ka blerë ekranet kryesore të mediave të cilat për faqen e tyre të zezë, kanë braktisur interesin publik. Mirënjohje për gazetarët, turp për pronarët oligarkë të mediave dhe ndjesë në emër të Partisë Demokratike për ata që u bënë milionerë në pushtetin tonë mbi djersën, gjakun dhe sakrificën tuaj dhe të shqiptarëve të ndershëm. Ora e drejtësisë po afron”, tha ndër të tjera ish-deputeti, që duket se tashmë synon të fitojë mbështetjen e votat e të zhgënjyerve të së djathtës./ Tirana Today
