Krimi ka shtrirë “tentakulat”. Përpos vrasjeve, atentateve mafioze, personazhet e botës kriminale tashmë po japin mesazhet në forma nga më të ndryshme. Një fishek model 56 ishte mesazhi kërcënues që i kanë lënë prokurorit Asllan Bajrami.
Asllan Bajrami, drejtuesi i Prokurorisë së Shkallës së Parë në Përmet, është kërcënuar për shkak të detyrës. Disa persona ende të paidentifikuar, kanë lënë në dritaren e zyrës së tij një fishek model 56, që dyshohet të jetë mesazh kërcënues.
Lidhur me këtë çështje, Bajrami ka depozituar kallëzim, ndërsa policia ka nisur hetimet për të mësuar rrethanat e saj.
Prokurori ka deklaruar se gjatë ditëve të fundit ka marrë thirrje në celular nga numra privatë, të cilat po verifikohen nga grupi hetimor.
