Kreu i Shtetit, Ilir Meta, ka reaguar për vendimin e tij në lidhje me kthimin në Kuvend të ligjit që ndëshkon median sa i përket rregullave ndaj COVID-19.
Qeveria parashikonte vendosjen e gjobave të larta ndaj mediave vizive, në rast se nuk respektoheshin rregullat mbrojtëse.
Me anë të një postimi në Facebook, ai thotë se përkrah masat që ndihmojnë në përballimin e pasojave ndaj pandemisë, por nuk do të dekretojë asnjë ligj që cenon lirinë dhe pavarësinë e medias.
Statusi
Përkrah masat kufizuese objektive që ndihmojnë në përballimin dhe tejkalimin sa më parë të pasojave të pandemisë COVID-19. Por nuk do të dekretoj asnjë rregull të ri, që në shpërdorim të procesit legjislativ dhe përmes masave ndëshkuese shproporcionale, cenon liritë dhe të drejtat kushtetuese të njeriut, veçanërisht lirinë dhe pavarësinë e medias.
