Prokuroria e Milanos ka bërë kërkesë zyrtare për anulimin e dënimit ndaj menaxherit shqiptar Fali Ramadani, ndaj të cilit ishte hapur një proces gjyqësor me akuzën e evazionit fiskal.
Sipas agjencisë së lajmeve ANSA, ishte hapur një gjyq duke akuzuar Ramadanin për evazion fiskal për një shifër rreth 6 milionë euro, për blerjen dhe shitjen e futbollistëve në territorin italian në vitet 2018-2022, mes të cilëve Dushan Vlahoviç, Federiko Kieza, Miralem Pjaniç, Kalidu Kulibali, Ivan Perishiç apo Ante Rebiç.
Guardia Di FInanza kishte ngritur akuzën ndaj Ramadanit për evazion pasi nuk kishte derdhur të ardhurat në Tatime për transferimet në fjalë, duke hipotetizuar ekzistencën e një “organizate të qëndrueshme në Itali” të kompanive irlandeze që ishin në pronësi të tij si “Primus Sports Consultancy Ltd”.
Po prokuroria gjatë hetimeve ka shqyrtuar dokumentacionin dhe ka shpjeguar se Ramadani nuk ishte në dijeni të shkeljeve dhe si rrjedhojë, nuk ekzistonte një veprim antiligjor dhe dëm nga ana e tij.
Edhe akuza, kishte pranuar faktin duke bërë të qartë se shpesh Ramadani vepronte në linjë telefonike jashtë territorit italian. Ndaj është kërkuar anulimi i çështjes dhe falja e plotë e Ramadanit.
Ky i fundit ndërkohë, ka paguar 2,5 milionë euro detyrime ndaj Tatimeve në Itali, si dhe ka hapur një kompani në shtetin italian, për të shmangur probleme të tjera me ligjin, në mënyrë që të vepronte i qetë. I akuzuar ishte edhe një bashkëpunëtor i tij, Mark Rautemberg, për të cilin gjithashtu pritet të bien të gjitha akuzat.
