Kryetari i Partisë Demokratike vizitoi këtë të diel banorët e prekur nga tërmeti në Fushë Mamurras, me qëllim për të parë më nga afër dëmet që shkaktuan lëkundjet e 26 nëntorit.
Në takimin e zhvilluar me banorët e prekur të kësaj zone, kryedemokrati u shoqërua me të rinjtë e FRPD-së, të cilëve iu shprehu mirënjohje për kontributin vullnetar.
Sipas Bashës, sot më shumë se kurrë kanë dalë në pah mangësitë institucionale dhe shtetërore, me korrupsionin dhe ndihmën selektive që u kanë bërë familjeve të goditura nga tërmeti.
“Në shtëpitë ku jam futur këto dy javë kam parë që para se t’i godiste tërmeti i 26 nëntorit, i kishte goditur tërmeti i varfërisë. Për fat të keq, mangësitë institucionale dhe shtetërore kanë dalë në pah më shumë se kurrë bashkë me korrupsionin dhe bashkë me atë që njerëzit po e dallojnë se po i ndajnë në të nënës dhe të njerkës. Në këtë kohë, kontributi vullnetar i të rinjve ka bërë një diferencë të jashtëzakonshme të përnatshme, të përditshme me nevojat bazike që nga fëmijët 4-5 muajsh e deri tek të moshuarit 80 apo 90 vjeç”, tha kreu i opozitës.
