Hetimet për origjinën e koronavirusit/ OBSH: Shpresojmë të përfshihemi

Zëdhënësi i Organizatës Botërore të Shëndetësisë, Tarik Jasareviq shprehet se OBSH dëshiron që të jetë pjesë e hetimeve të Kinës për origjinën e koronavirusit.

Jasareviq tha për AFP-në se OBSH është në dijeni të të një numri hetimesh në Kinë për të kuptuar më mirë burimin e shpërthimit të pandemisë. Por sqaroi se ky institucion nuk është i përfshirë në këto studime.

“OBSH-ja do të dëshironte të punonte me partnerët ndërkombëtarë për të marrë pjesë në hetime rreth origjinës së virusit”, tha ai.

Dyshimet e shkencëtarëve vijojnë të jenë mbi teorinë se virusi u bart nga kafshët tek njerëzit, në një treg në Wuhan të Kinës.

Por, presidenti i SHBA-ve, Donald Trump insiston se virusi mund të ketë dalë nga një laborator sekret kinez, por kjo e fundit i ka mohuar vazhdimisht këto akuza.

OBSH-ja gjithashtu është përballur me kritika të ashpra nga ana e Trumpit, i cili në fillim të këtij muaji pezulloi fondet e Uashingtonit ndaj organizatës pasi e akuzoi për keqmenaxhim të situatës.