Ish-deputeti i Partisë Demokratike, Azgan Haklaj, ka hedhur akuza të forta kundër ish-kryeministrit Sali Berisha. I ftuar në emisionin “Spotlight”, Haklaj nënvizoi se kreu i PD-së, Lulzim Basha ka mbështetjen e amerikanëve. Kritika ka ndaj “Foltores” së ish-kryeministrit Berisha, duke e cilësuar si një grumbullim me nostalgjikë, ku nuk ka program dhe filozofi.
“Pra, loja është përtej PD-së. Është lojë shumë e rrezikshme, ndaj kanë zbarkuar amerikanët. Do zbarkojnë edhe të tjerë, edhe amerikanë të tjerë, për interesat e mëdha amerikane. Nuk janë ushtarë, janë përfaqësues të shtetit amerikan, të Kongresit dhe të Departamentit të Shtetit Amerikan.
Lulzim Basha ka mbështetjen e Amerikës, ka mbështetjen e strukturave të PD-së të Shqipërisë, ka mbështetjen e anëtarësisë. Është votuar nga anëtarësia e PD-së të Shqipërisë dhe Kuvendi Kombëtar i drejtuar nga Basha ku ka qenë edhe Berisha. Ka miratuar një statut, dhe statuti e ka të qartë. Unë dyshoj se s’ka mbledhur firmat. “Foltorja” ka qenë një bashkim si policat grekë dikur me fol. A ka program? Nuk ka program! A ka filozofi? Nuk ka filozofi! Ka njerëz që kanë ardhur edhe nga perëndimi, nostalgjikë dhe kanë folur. Vetëm në “Foltoren” e Lezhës kanë folur përfaqësues institucional të PD-së. Në asnjë “Foltore” tjetër, nuk kanë folur delegatët”, u shpreh ai.
Sali Berisha vijon me “Foltoret” e tij në të gjithë vendin. Sakaq, Lulzim Basha është shprehur herë pas here se nuk do të lejojë një Kuvend anti-amerikan, pasi aleanca me SHBA-në është jetike që PD-ja të pretendojë për të ardhur në pushtet.
