Dorëheqja e Ardi Veliut, duke mos përfunduar dot mandatin e plotë 5-vjeçar në këtë post, ka sjellë reagime të shumta. Veliu i paraqiti kryeministrit dorëheqjen mbi tryezë, të cilën Edi Rama e pranoi. Ish-prokurori Shkëlqim Hajdari flet për revolucion në radhët e uniformave blu, duke sjellë në fokus në shenjë këmbane alarmi se beteja me kanabisin nuk ka përfunduar.
Mjaft i drejtëpërdrejtë në qëndrimin e tij, z. Hajdari tha nga studio e emisionit “Breaking” në “Top News” se policia ka nevojë për një shkundje të fortë, ndërsa u shpreh se ka segmente të policisë që bashkëpunojnë me krimin. Shkëlqim Hajdari propozoi revolucion në sektorin e policisë kriminale, ku trupa e policisë duhet të dijë si funksionon kriminaliteti.
“Nuk kemi fituar ende betejën me kanabisin. Kam shifra reale, beteja me kanabisin vazhdon. Kemi raste të bashkëpunimit të segmenteve të caktuara të policisë me krimin. Policia duhet të shkundet. Duhet revolucion në sektorin e policisë kriminale. Trupa e policisë duhet të dijë si funksionon kriminaliteti”, tha Hajdari.
Ai pati edhe një mesazh për klasën politike, së cilës i kërkoi të heqë duart nga policia. “Klasa politike duhet të dakordësohet mbi pavarësinë e Policisë së Shtetit. Këtu fillon pasi drejtuesit politik, Ministrat e Brendshëm kanë prodhuar drejtorë policie pa garë, e kanë marrë pjesë në emërimet e tyre, e kjo ka bërë Policinë e Shtetit jo profesionale dhe jo të pavaruar në ndërmarrjen e operacioneve”, tha Hajdari.
Shkëlqim Hajdari u shpreh se Veliut do ti vendoste një notë kaluese, marrë shkas edhe nga ngjarjet kriminale që kanë ndodhur në vendin tonë.
“Nuk është se erdhi pa karrierë, por ngjarjet janë të rënda. Veliut do i vendosja një notë kaluese, duke ia lënë në dorë specialistëve e gazetarëve, vetëm politikanët mos i pyesni për notë”.
Dorëheqja e Ardi Veliut vjen vetëm pak ditë përpara mbarimit të afatit të vendosur nga kryeministri Edi Rama. Rreth tre muaj më parë, pas ngjarjeve të shumta kriminale në vend, Rama vuri një afat prej 100 ditësh për strukturat e policisë duke thënë se brenda këtij afati ata duhet të vendosnin rendin dhe angazhimin maksimal. Ekzekutimi i efektivit Saimir Hoxha në Lezhë dhe atentati me dy viktima në Elbasan, i vendosën vulën fatit të Veliut.
