Persona të armatosur me kallashnikov kanë hyrë në një apartament të noterit të njohur T.Kaçi, 63 vjeç në Sarandë. Ngjarja është shënuar në lagjen nr. 4 të qytetit bregdetar, ku maskat kanë lidhur familjarët, dhe kanë arritur të marrin 20 milionë lekë të vjetra.
Policia e Sarandës ka dhënë detajet e para nga grabitja e noterit T. Kaçi në këtë qytet. Në banesën e noterit kanë hyrë dy persona, të cilët përveç lekëve, i kanë marrë dhe dy çelësa makinash. Fatmirësisht, shtetasi T. K., nuk ka pësuar dëmtime dhe ndodhet në gjendje të mirë shëndetësore. Blutë e Sarandës kanë rrethuar zonën dhe vijojnë krehjen e saj, me qëllim kapjen e autorëve.
Sarandë/Informacion paraprak
Më datë 20.10.2021, rreth orës 08:10, në sallën operative Sarandë, ka telefonuar shtetasi T. K., banues në lagjen nr.4, Sarandë, për të njoftuar se dy persona ende të paidentifikuar, i kishin hyrë me dhunë në banesë dhe i kishin vjedhur një shumë parash dhe dy çelësa automjetesh.
Shtetasi T. K. nuk ka pësuar dëmtime dhe ndodhet në gjendje të mirë shëndetësore. Shërbimet e Policisë kanë shkuar menjëherë në vendngjarje, kanë rrethuar zonën dhe vijojnë krehjen e saj, me qëllim kapjen e autorëve. Grupi hetimor vijon punën për zbardhjen e rrethanave të ngjarjes, dhe fiksimin e çdo prove materiale që do çojë në identifikimin dhe kapjen e autorëve.
