Autoritetet kufitare serbe kanë ndaluar ditën e djeshme një makinë pasi në bagazhin e saj kanë gjetur të fshehur një vajzë.
Siç shihet edhe nga fotoja, vajza 9-vjeçare nga Podujeva ishte e fshehur në vendin e gomës rezervë. Automjeti ku po fshihej vajza, ishte me targa gjermane dhe drejtohej nga një burrë 42-vjeçar dhe shoqërohej nga djali i tij 17-vjeçar, të dy me përkatësi etnike shqiptare.
Sipas mediave serbe, shoferi i makinës është shprehur se vajza është e motrës së tij, e cila jeton në Gjermani, dhe se vajza ishte fshehur aksidentalisht në bagazh pasi po luante.
Të dyshuarit janë arrestuar ndërsa vajza është marrë nga punëtorët e Qendrës për Punë Sociale në Prokuplje.
Ndërkohë, familjarët e të arrestuarve në Kosovë, shprehen se fëmija ishte tentuar të kalohet ilegalisht në Gjermani te nëna e saj, pasi edhe pas 4 vite përpjekje kanë dështuar të ia rregullojnë dokumentet për ta bashkuar me nënën e saj e cila jeton atje.
