Kryetari i grupit të Partisë Socialiste, Taulant Balla në mbyllje të kongresit socialist ka komentuar edhe deklaratën e Presidenti Meta, bërë disa ditë më parë ku tha se do të vetësakrifikohej, me qëllim që në vend të mos instalohej një juntë ushtarake.
Deklaratën e presidentit, Balla i quajti thjesht “ëndrra të këqija”
“Sipas fjalës së kryeministrit, Edi Rama, i cili ishte sot vetëm 50 metra në vijë ajrore nga presidenca dhe besoj se edhe presidenti është qetësuar, sepse Shqipëria është vend anëtar i NATO-s . Dhe besoj së është qetësuar për ëndrrat e këqija që kish parë para pak ditësh”, tha Balla.
Gjithashtu Balla u shpreh se shumica do të miratojë reformën zgjedhore bazuar te rekomandimet e OSBE-së.
“Opozita ka krijuar një ngërç artificial. Na lind detyra të përfaqësojmë masën e të gjithë shqiptarëve që duan një të ardhme më të mirë. Ka ardhur koha të bëjmë një bilanc të angazhimeve.
PS-ja është e vendosur për të cuar përpara reformën zgjedhore sipas rekomandimeve të OSBE-së duke e bazuar në tre shtylla, depolitizimi, sigurimi i votës dhe aplikimi i teknologjisë për votim dhe numërim elektronik”, deklaroi Balla.
