Komisioni Hetimor ka miratuar raportin final për shkarkimin e presidentit Ilir Meta, dhe do t’ia dërgojë atë Kuvendit të Shqipërisë, për ta futur në seancë plenare. Kreu i Komisionit Alket Hyseni ka hedhur në votim raportin, i cili është mbështetur nga të gjithë deputetët në mënyrë unanime. “Kush është dakord me raportin, konkluzionet e tij, gjithë sugjerimet? Miratohet raporti i Komisionit Hetimor për verifikimin e shkeljeve të rënda kushtetuese nga Presidenti i Republikës së Shqipërisë, me votat unanime të gjithë anëtarëve të Komisionit. Vlerësim maksimal për secilin nga ju kolegët”, deklaroi Hyseni. Duke iu referuar raportit voluminoz, presidenti Ilir Meta ka kryer shkelje të rënda të Kushtetutës.
Me 11 vota pro nga të dyja kampet e politikës, socialistëve dhe opozitës është miratuar raporti prej 97 faqesh i Komisionit Hetimor parlamentar, për shkarkimin e presidentit Ilir Meta.
Presidenca dhe mazhoranca socialiste, prej thuajse prej dy vitesh, janë në luftë me njëra-tjetrën, ç’ka detyroi këtë të fundit që të ngrejë për herë të dytë një Komision Hetimor, i cili po heton veprimtarinë dhe deklaratat e bërë nga kreu i shtetit, para, gjatë fushatës dhe heshtjes zgjedhore sa i takon zgjedhjeve parlamentare të 25 prillit. Kreu i Shtetit, Ilir Meta, duket se i ka ditët e numëruara në krye të Presidencës, pasi Partia Socialiste ka vulosur sot fatin e tij.
