Një tragjedi u shënua në orët e para të mëngjesit të sotëm në Shqipëri. Si pasojë e një tërmeti me magnitudë 6.4 të shkallës Rihter, dhjetëra qytetarë humbën jetën, ndërsa qindra të tjerë kanë mbetur të plagosur. Bilanci i viktimave sa vjen e rëndohet.
Ndërkohë, shumë qytetarë, banesat e të cilëve iu janë shembur, detyrohen që të kalojnë netët jashtë. Por, shumë të tjerë ndodhen në gjendje të rënduar psikologjike; nga frika se mos përjetojnë sërish tmerret e kaluara disa orë me parë, preferojnë që të qëndrojnë jashtë ndërtesave.
Për këtë qëllim, në dy zonat më të prekura nga lëkundjet sizmike, Thumanë dhe Durrës, janë ngritur çadra për strehimin e personave të prekur nga tërmetet.
Menjëherë në ndihmë iu është gjendur Fondacioni “Fundjavë Ndryshe”. I cili vijon pareshtur punën me shpërndarjen e ndihmave për të prekurit nga tërmetet.
Siç mund ta shikoni edhe në videon e publikuar në rrjetin social “Facebook”, grumbullimi i ndihmave nisi në sheshin “Nënë Tereza”. Prej aty, vullnetarët u zhvendosën drejt Thumanës. 50 kamionë dhe dhjetëra makina, të mbushura me ujë, rroba, dyshekë, veshmbathje, shtretër dhe ushqime të gatuara, janë dërguar në zonat e prekura.
Më pas, stafi dhe aktivistët e “Fundjavë Ndryshe” udhëtuan drejt Durrësit, më konkretisht në stadiumin “Niko Dovana”, aty ku janë ngritur dhe çadrat, e ku po strehohen provizorisht qytetarët.
“Me radhë po shpërndahen ushqimet. Është shkarkuar kamioni i parë. Siç duket këtu është një situatë kaotike. Këtu ka njerëz që kanë nevojë për të ngrënë. Presim që të vijnë edhe ndihmat e tjera nga Tirana. Kemi shkarkuar dy makina, kemi edhe kamionët me dyshekë”, u shpreh themeluesi i këtij fondacioni, Arbër Hajdari.
Aksioni për t’i ardhur në ndihmë qytetarëve ka nisur që në orën 4:30 të mëngjesit, por aktivistët e “Fundjavë Ndryshe” nuk ndalen në misionin e tyre.
Po ashtu, Arbër Hajdari bëri me dije se me qetësimin e situatës, do të bëhet edhe analizimi i rasteve në nevojë; për të vijuar më pas punën me ndërtimin e banesave./TIRANA TODAY
