Një tragjedi e vërtetë ndodhi sot në Shqipëri, ku rreth orës 4 të mëngjesit një tërmet me magnitudë 6.4 ballë shkundi vendin.
Epiqendra e tërmetit ishte 10 kilometra larg nga Durrësi dhe 31 kilometra larg nga Tirana.
Fatkeqësisht, deri në këto momente kanë ndërruar jetë 13 persona.
Situata paraqitet kritike në Thumanë, ku raportohet se janë shembur tre pallate dhe dyshohet se nën rrënoja ka njerëz.
Pallate të shumtë janë shndërruar në të pabanueshëm, pasi tërmeti ka lënë pasoja vërtet të rënda.
Në Thumanë, qytetarët të frikësuar nga kjo ngjarje tragjike kanë braktisur shtëpitë dhe pallatet e shembura për t’u strehuar në çadra.
Stafi dhe vullnetarët e Fondacionit “Fundjavë Ndryshe” kanë dalë në terren me qëllimin parësor për t’iu ardhur në ndihmë të prekurve nga tërmeti.
Siç mund ta shikoni edhe në videon e publikuar “live” në rrjetin social Facebook, ata kanë nisur shpërndarjen e ushqimeve dhe ndihmave në Thumanë.
Përpos kësaj iniciative solidarizuese, “Fundjavë Ndryshe” ka ngritur tek Sheshi Nënë Tereza një pikë grumbullimi për ndihmat emergjente.
Ndërkohë në “Qendrën e Solidaritetit Fundjavë Ndryshe” vazhdon grumbullimi i ndihmave. Edhe këtë herë, si çdo herë tjetër, shqiptarët nuk e lanë njëri-tjetrin në baltë.
https://www.instagram.com/p/B5U4eseg3Ie/
Kujtojmë se Drejtuesi i Fondacionit FN Arbër Hajdari, më herët, u ka bërë apel të gjithëve të ndihmojnë me aq sa kanë mundësi shqiptarët e prekur nga tërmeti fatal.
/TIRANA TODAY
