Në nisje të Rrugës së Arbrit disa mjedise të ish-uzinës së artilerive do të përdoren për të ndërtuar qendrën më të madhe sociale në Ballkan. Një projekt i fondacionit “Fundjavë Ndryshe”, mbështetur dhe nga qeveria. Qendra do të ketë një shkollë profesionale, qendër rehabilitimi për të varurit nga droga dhe magazina ku do të mbledhin donacionet nga shoqëria.
Zëvendës presidentja e “Fundjavë Ndryshe” Emina Cunmulaj tha se vetëm duke u bërë bashkë mund të bëhen vepra të mira. Dhe realizimi i “Qendrës së Solidaritetit” është një projekt që do të ndihmojë me qindra familje shqiptare të varfra.
“Kur më shprehu Arbëri idenë për këtë projekt i thashë “a je i krisur”, siç themi ne malësorët. Edhe nëse e njihni Arbërin siç e njoh unë, e dini se ideja e tij bëhet realitet domosdoshmërish. Por, të paktën ka gjetur një njeri si veten dhe së bashku do të realizojmë shumë gjëra.
Ide që njerëzit thonë se vetëm në ëndrra e besojnë se mund të realizohen. Sidoqoftë së bashku me ju dhe me shtetin sepse pa të nuk bëhet asgjë, do realizojmë disa gjëra që janë të domosdoshme për familjet që kanë nevojë. Për ta një qendër e tillë është e domosdoshme.”
Në ceremoninë e përurimit ishte pjesë edhe ministrja e Infrastrukturës dhe Energjisë Belinda Balluku. E cila shprehu vlerësimin për projektin, si edhe gatishmërinë e shtetit për t’i ardhur në ndihmë.
“Ky projekt e ka mbështetjen e qeverisë dhe ne e kemi nisur këtë bashkëpunim me marrjen e truallit, mbështetjen nga OSSHE dhe gjithçka tjetër. Por, ju duhet të dini që keni mbështetjen e secilit nga ne si njerëz. Secili nga ne duhet të japë kontribut në këtë nisëm të madhe.
Siç dhe kjo është nisma e parë e madhe për të mbështetur njerëzit në nevojë. Shkolla profesionale që ju do të bëni është diçka që unë e has kudo, është një kërkesë që gjitha bizneset e kanë. Kanë nevojë për njerëz të kualifikuar dhe nuk mjafton universiteti, duan shkollat profesionale.
Diçka që ju po e ngrini këtu dhe shteti nuk i zgjidh dot të gjitha problematikat, hallet e njerëzve. Ndaj ka nevojë për zemra të mëdha ashtu siç është “Fundjava Ndryshe” dhe Arbëri. Unë kam një djalë 13 vjeç dhe do të doja shumë që ai kur të rritej, të bëhej si Arbëri. Dhe unë të isha krenare siç është babai i vetë për të.”
Ndërkohë drejtuesi i “Fundjavë Ndryshe” Arbër Hajdari lajmëroi se janë duke bashkëpunuar dhe me bizneset për të vlerësuar nevojat e tregut, me qëllim implementim në shkollën profesionale.
“Këtu shumë shpejt do të takohemi për të nisur aktivitetin e kësaj qendre. Kjo qendër do të na japë mundësi të ndihmojmë më shumë familje në nevojë. T’i bëjmë të mundur qindra të rinjve e të rejave që nuk kanë mundësi të arsimohen e specializohen. Në këtë qendër të mësojnë pa para profesione e zanate për të qenë njerëz që jetojnë denjësisht. Shqipëria ka nevojë për shkollën profesionale, një shkollë që do të jetë me standarde europiane.
Do të bashkëpunojmë me gjithë bizneset dhe së bashku me to do të përcaktojmë numrin e njerëzve që do të specializohen tek ne për secilin profesion. Në fazën e parë mendojmë të ngremë ambiente magazinimi deri në 2 mijë ton ushqime në muaj, veshmbathje, asete shkollore. Si edhe të gjithë orenditë që shqiptarët duan të dhurojnë. Pra, gjithçka që i duhet një familje për të dalë nga problemet e shtëpisë së tyre.”
Ceremonia u pasua me mbjelljen e një ulliri simbolik dhe të ftuarit vizituan gjithë ambientin ku do të zhvillohet projekti./ TIRANA TODAY
