Në një kohë kur e gjithë Shqipëria është në karantinë, Fondacioni “Fundjavë Ndryshe” ka trokitur derë më derë, për t’i ardhur në ndihmë shqiptarëve, të cilët po kalojnë këto ditë të vështira nga koronavirusi vdekjeprurës.
Thirrja e autoriteteve është për të qëndruar të mbyllur brenda banesave. E ndërsa “Fundjavë Ndryshe”, ka arritur që të shkojë deri në zonat më të thella, duke iu ofruar ushqime, e deri tek produktet farmaceutike, kryesisht dezinfektantë, në mënyrë që ata të mbrohen nga COVID-19.
Stafi i Fondacionit, me në krye themeluesin Arbër Hajdari, prej disa ditësh ndodhet në terren, për të shpërndarë ndihma tek shqiptarët e vetë-izoluar.
E ky gjest human është vlerësuar edhe nga kryeministri Rama, i cili ka shprehur falenderimet ndaj punës së pakursyer të kësaj gjenerate të re, që ka dhënë kontributin e pakursyer edhe në këto ditë të vështira për mbarë popullin shqiptar. Bëhet fjalë për një shpërndarje masive ndihmash, specifikisht, për mbi 8000 familje të izoluara.
“FUNDJAVË NDRYSHE, KRAHU I DJATHTË I OPERACIONIT HUMANITAR, MERITON GJITHË MIRËNJOHJEN TONË PËR VAJZAT E DJEMTË, QË VULLNETARISHT PO SAKRIFIKOJNË ÇDO DITË, BASHKË ME FORCAT E SHTETIT NË TERREN, DUKE U BËRË SHËMBËLLTYRA E NJERËZILLËKUT NË KËTË KOHË KOLERE. #RESPEKT”, shkruan Rama në postimin e radhës në rrjetin social Facebook.
