Për besimtarët katolikë dhe ortodoksë, fundviti sjell një nga festat më të rëndësishme në kalendarin e tyre fetar, e cila është dita e Krishtlindjes.
Dita e Krishtlindjes kremtohet me shfaqjen e skenës së lindjes së Krishtit, pemën e Krishtlindjes, shkëmbimin e dhuratave dhe kartolinave, familjen e bashkuar, dhe ardhjen e Shën Nikollës apo Plakut të Vitit të Ri në prag të Krishtlindjes apo mëngjesin e Krishtlindjes.
Krishtlindja është festa në të cilën besimtarët dëshirojnë më shumë se kurrë paqe e dashuri në botë.
Besimtarë nga qytete të ndryshme të vendit ishin të pranishëm mbrëmjen e djeshme në katedralen e Shën Palit në Tiranë, për të kremtuar Krishtlindjet.
Ndryshe nga vitet e tjera, këtë vit pandemia e ka bërë më të vështirë kremtimin e kësaj feste në mënyrën e duhur. Për shkak të zhvendosjes së orës policore, këtë vit mesha e Krishtlindjeve është mbajtur në orën 18:00.
Por masat kufizuese nuk i kanë ndaluar besimtarët të mblidhen për të ndjekur meshën që mbahet çdo vit.
Imzot George Frendo është shprehur se ishte shumë i lumtur që pjesëmarrja ishte e madhe dhe që të gjithë zbatuan masat anti-covid, duke nisur nga mbajtja e maskës dhe distancimi social.
Ndërkohë, për besimtarët ortodoksë mesha është mbajtur në orët e para të mëngjesit, duke kryer edhe ritet përkatëse të festës.
Besimtarët që morën pjesë në meshën e mbajtur në Katedralen Ortodokse “Ngjallja e Krishtit” respektuan gjithashtu masat e vendosura nga qeveria, për ndalimin e përhapjes së virusit Covid-19 duke mbajtur maskën gjatë gjithë ceremonisë dhe duke respektuar distancën nga njëri-tjetri.