Kryeministri Edi Rama ka mbledhur sërish ditën e sotme një mbledhje të jashtëzakonshme të qeverisë, në lidhje me pasojat e tërmetit të 26 nëntorit.
Gjatë fjalës së tij në tryezë, Rama iu premtoi banorëve të prekur se pas Vitit të Ri nuk do të qëndrojnë më në hotele.
Ai u shpreh se të gjithë këto familjarë do të kalojnë nëpër apartamente, ku do të qëndrojnë deri sa të jenë gati shtëpitë e tyre. Kreu i qeverisë theksoi se qiraja do të jetë e mbuluar nga qeveria.
“Kam një merak për ata që janë në zonat rurale për nevojën për t’u garantuar cilësi maksimale. Duhet të fillojë identifikimi i apartamenteve që shteti do të marrë me qira, ku do të qëndrojnë deri kur të bëhet rindërtimi, që do të zgjasë, nuk bëhet sa hap dhe mbyll sytë. Pasi të kalojën Krishtlindjet edhe Vitin e ri në hotele si njerëz dhe në Janar të kalojnë në apartamente që të ketë minimumin jetik, jo të shtrihen përtokë në çimento, por me pajisjet e nevojshme, me dyshekë.
Mendoj që brenda 2020 duhet të jenë të gjithë të sistemuar, masa e madhe që i kanë banesat e dëmtuara që mund të riparohen, ndërkohë që ata që do të rindërtohen totalisht, do të jetojnë në kushte normale deri kur të kthehen në shtëpitë e tyre, ku do të bëhen të reja ose diku tjetër”, tha ai.
