Teksa ‘ethet’ e afrimit të zgjedhjeve po ndihen nga protagonistët politikë, ka edhe nga ato qëndrime surprizë. Fabian Topollaj, përfaqësues i Bindjes Demokratike, deklaroi në “Dita jonë” në A2 se nuk shikon asnjë pengesë që BD-ja të bashkëpunojë me forcën e re të Jozefina Topallit.
“Bindja Demokratike ka marrë dy vendime kryesore: e para, refuzojmë të dalim me një koalicion para zgjedhjeve me tre forcat kryesore politike në vend, por jemi të hapur për bashkëpunim me këdo që mendon njësoj si ne.
E dyta, në kushtet kur listat nuk u hapën, duam një listë të përbashkët me ne dhe ta hapim atë listë 100%. Me plotësimin e këtyre dy kushteve, nuk shikoj asnjë pengesë që të bashkëpunojmë me forcën e zonjës Topalli”, u shpreh Topollaj.
Sipas tij, “është pozitiv pasurimi i spektrit opozitar, jo vetëm sa i përket të djathtës”.
“Shqipëria nuk ka asnjë të keqe nga lindja e partive të reja opozitare, pasi për mendimin tim ato i shkurtojnë jetën opozitës”, theksoi Topollaj.
Referuar etiketimit të partive të reja si “kukulla” të Edi Ramës, Topollaj tha se nuk është çuditur nga reagimi i kryedemokratit. “Lulzim Basha ka pasur prioritet mbajtjen e monopolit të opozitës dhe në këtë aspekt, ky është reagim i pritshëm, pasi ai e shikon opozitën si pronë të tij.
Forcat politike të reja, përfshirë Bindjen Demokratike, janë forca qartazi opozitare. Nuk më çudit reagimi i Bashës, pasi qëllimi i tij kryesor është mbajtja e monopolit të opozitës, sepse mendon se pushteti do t’i vijë vetë një ditë. PD dhe LSI i ofrojnë shqiptarëve sot vetëm rotacionin dhe kjo nuk është ajo që kanë nevojë shqiptarët sot. Ne i ofrojmë shqiptarëve ndryshimin”.
Pak më herët reagoi edhe kryetari i Bindjes Demokratike, Astrit Patozi, lidhur me ballinën e gazetës Rilindja Demokratike ku mbi foton e tij dhe të kryetarëve të partive të tjera të vogla është vënë diçitura “kukullat e Ramës”. Ky reagim vjen pasi Basha deklaroi se asnjë nga partitë e reja që po formohen së fundmi, mes të cilëve edhe ajo e ish-kryetares së Parlamentit, Jozefina Topalli, nuk kanë dalë nga PD-ja, por janë parti të krijuara nga kryeministri Rama.
