Në fjalën e mbajtur sot në Kuvend, ministri i Drejtësisë, Besfort Lamallari, tha mes të tjerash se viti 2024 shënoi një kthesë reale me shifra e fakte në luftën kundër krimit në përgjithësi dhe kundër krimit të organizuar në vecanti. Sipas tij drejtësia tashmë ka hyrë në një fazë të re konsolidimi dhe se tani kemi qartësisht një realitet të ri institucional.
“Në vitin 2024, Shqipëria ka pasur rritjen më të lartë të hetimeve proaktive dhe të sekuestrimeve pasurore në 5 vitet e fundit. Hetimet e nisura kryesisht nga prokurorët janë shtuar me 12.3%. Janë sekuestruar dhe konfiskuar 65.5 milionë euro pasuri – një rritje me gati 60% krahasuar me vitin e kaluar. Kjo është rritja më lartë në pesë vitet e fundit. Po ecën shumë mirë procesi i implementimit të sistemit elektronik CAMS është në zhvillim me mbështetjen e BE-së. Ne sot ne kemi një sistem që ka pavarësi prej politikës e që prodhon besim. Raporti i Kuvendit dëshmon se drejtësia penale shqiptare po ecën drejt konsolidimit të standardeve evropiane”, deklaroi ministri i Drejtësisë, Besfort Lamallari.
Në vijim ai tha se mazhoranca ka përgjegjësinë historike për ta konsoliduar më tej këtë reformë dhe se drejtësia e re duhet të garantojë standarde të panegociueshme demokratike njësoj si në vendet evropiane.
“Po të ishte në dorë të një pjese të politikës, ajo pjesë që e sulmon edhe sot e gjithë ditën, Reforma në Drejtësi mbase nuk do të ishte bërë kurrë. Tani, po kjo mazhorancë, ka përgjegjësinë historike për ta konsoliduar më tej këtë reformë dhe shqiptarët të kënë më në fund drejtësinë e munguar qysh nga dita e parë e themelimit të shtetit tonë. Shqipëria ka hyrë në një fazë të re. Sot ne po negociojmë denjësisht me Komisionin Evropian, me ambicien historike për të qenë në 2030 si të barabartë mes të barabartësh. Pas kapërcimit të madh që ne bëmë duke ia hequr drejtësinë nga duart politikës dhe çdo lloj ndikimi tjetër, sot është koha për një dimension të ri. Një drejtësi që të garantojë standarde të panegociueshme demokratike, njësoj si në vendet evropiane”, tha Lamallari.
Sa i përket vitit 2025, Lamallari tha se fokusi është transparenca, integriteti, siguria në godinat e gjykatave e prokurorive dhe përdorimi masivisht i teknologjisë.
“Në vitin 2025, ne nuk do të flasim më për reformë, por për konsolidim. Për drejtësi të matshme, të aksesueshme dhe të ndershme. Në këtë rrugë, Ministria e Drejtësisë do të vazhdojë të jetë jo vetëm një koordinatore e politikave, por një udhëheqëse e transformimit të sistemit sipas zotimit të bërë ndaj qytetarëve shqiptarë në radhë të parë, por edhe ndaj Komisionit Evropian dhe Bashkimit Evropian në tërësi”, deklaroi Ministri i Drejtësisë.
