Presidenti i Turqisë, Recep Tayyip Erdoğan, pas marrjes së njoftimit për tërmetin shkatërrimtar në Shqipëri, ka bërë publike komunikimin e vazhdueshëm me kryeministrin Rama. Gjatë fjalimit në hapjen e mbledhjes së 35-të të Komitetit të Përhershëm për Bashkëpunim Ekonomik dhe Tregtar (COMCEC), të Organizatës së Zhvillimit Islam, ai ka thënë se ka biseduar dy herë me Ramën.
“Pas lajmit të tërmetit, dje bisedova dy herë me kryeministrin e Shqipërisë, Edi Rama. I uruam të shkuara”, u shpreh Erdoğan.
Duke bërë një pasqyrë të përgjithshme të situatës në Shqipëri, presidenti turk ka thënë se qytetet ishin rrënuar. Ndaj, ka shtuar më tej ai, është e dobishme për të organizuar donatorët.
“Natyrisht qytetet ishin rrënuar seriozisht. Këtu neve na takon diçka, duhet të organizojmë një mbledhje të donatorëve. Sepse në lidhje me ndërtesat e rrënuara, mendoj se duhet të jemi pranë Shqipërisë, gjë e cila është veçanërisht detyrë e Organizatës Islame për Zhvillim. Besoj se është shumë e dobishme që të hedhim këtë hap. Kjo është një detyrë vëllazërie”, theksoi presidenti turk.
Erdoğan shprehu besimin se vendi i tij, dhe të gjitha vendet pjesëmarrëse në këtë mbledhje, do ta ndihmojnë Shqipërinë në këto momente të vështira.
Presidenti i Turqisë, duke informuar rreth ndihmave të Turqisë tha: “Ne me shpejtësi dërguam avionët tonë kargo, Gjysmëhënën e Kuqe Turke, AFAD i kemi dërguar në Shqipëri. Një pas, një nga këto autokolonat tona janë duke shkuar në rajon. Besoj se edhe maunet me ndihma humanitare do të mbërrijnë gjatë ditës. E kuptojmë shumë mirë Shqipërinë, si një vend i cili më parë shumë herë ka qenë e prekur nga tërmete të mëdha. Të gjithë duhet të qëndrojmë pranë Shqipërisë, qoftë në ofrimin e trajtimit mjekësor ndaj të plagosurve, qoftë të atyre që shtëpitë u janë shkatërruar ose dëmtuar. Jemi në stinën e dimrit. Duhet të parashikojmë se në çfarë gjendje mund të jenë vëllezërit tanë atje, në këtë stinë të ftohtë”.
“Unë këtu, nëpërmjet jush, gjithë botës islame i bëj thirrje që ta mbështesë Shqipërinë”, deklaroi Erdoğan. Shqipëria u godit nga dy tërmete të fuqishme me epiqendër në Durrës, në orën 3:55, me magnitudë prej 6.3 ballë në thellësi prej 10 kilometrash. Dhe më vonë me një magnitudë prej 5 ballë në Kepin e Rodonit.
