Përpos protestës, një vemendje të madhe mori edhe vajza e cila u shtir në një intervistë se ishte e motra e të ndjerit Klodjan Rasha. Intervista e saj u shpërmda në rrjet, e në kohë reale pati edhe një reagim nga familja e 25-vjeçarit se vajza nuk ishte pjesë e familjes së tyre. Vajza e cila pretendoi se ishte e motra e të ndjerit, ka reaguar sërish.
Bukuroshe Sali deklaroi se ishte motra e të ndjerit, dhe e gjithë vëmendja e mediave u përqendrua tek ajo. Familja Rasha e mohoi diçka të tillë dhe thanë se ajo nuk është pjesëtare e tyre. Aludimet e para ishin në lidhje me faktin se ajo mund të kishte probleme të shëndetit mendor.
Në një intervistë të dytë, ajo u shpreh se nuk e kishte vëlla biologjik Klodjanin, por e konsideronte të tillë për shkak të marrëdhënies shumë të afërt që bashkëshorti i saj kishte patur që në fëmijëri me të.
“E vranë kot. Kërkojmë të drejtën tonë. Isha në Itali dhe erdha me urgjencë sapo morëm vesh se çfarë ka ndodhur. Ka qenë djalë i mirë, nuk ka pasur asnjë problem, ka qenë shumë i qetë. Ka pas dhe një vajzë në jetën e tij, ishte nga Dibra. Kur erdha unë, nuk e takova dot të gjallë, e pashë në arkivol. Më ka prek në zemër. Kam dhe dy vëllezër të tjerë, unë jam motra e vetme, ishte vëllai i vogël. Policia që është shtet të qëllojë njëherë në ajër…pastaj…jo ashtu, direkt në zemër”, tha ajo dje.
Protesta e thirrur në rrjetet sociale pas vrasjes nga policia të 25-vjeçarit Klodjan Rasha, nisi paqësisht dhe degjeneroi në dhunë dhe përplasje me uniformat blu. Ministri Lleshaj ka reaguar për këtë ngjarje të rëndë ditën e djeshme, me anë të një postimi në rrjetin e tij social Facebook. Edhe pse pritej dorëheqja e tij, ai shprehu ngushëllimet ndaj prindërve dhe familjarëve.
