Bashkimi Evropian del kundër marrëveshjes së Shqipërisë dhe Italisë, që të sillen 20 emigrantë në vendin tonë. BE-ja thotë që emigrantët e ndodhur në brigjet e Italisë duhet të transferohen në vende të treta si Shqipëria me miratimin e tyre.
Zëdhënësja e BE-së, Natasha Bertaud, thotë se është në dorën e autoriteteve italiane për të siguruar kushtet në përputhje me ligjet e azilit.
“Kur bëhet fjalë për marrëveshjet dypalëshe midis një shteti anëtar dhe një vendi të tretë”, siç është Shqipëria për zhvendosjen e emigrantëve, “ne duhet t’i pyesim ata” me detaje, por “ka më shumë elementë që duhet të shqyrtohen” për të vlerësuar ligjshmërinë e tyre, në veçanti “pëlqimin e njerëzve” për të kërkuar azil në një vend tjetër përveç vendit të mbërritjes”, thotë Bertaud cituar nga Ansa.
“Dërgimi i azilkërkuesit në një vend të tretë, pa e vlerësuar kërkesën për azil, përbën refuzim dhe nuk lejohet as nga BE dhe as nga e drejta ndërkombëtare”, u shpreh Bertaud gjatë konferencës për shtyp.
Zëdhënësja tha gjithashtu se elementët e tjerë që duhen marrë parasysh janë direktivat për azilin dhe kthimin dhe rastet nëse emigranti ka të drejtën e azilit.
“Aplikimi konkret” i këtyre rregullave është “të sigurohet se ato respektohen nga autoritetet kombëtare”, shtoi ajo.
100 emigrantë nga Afrika janë strehuar në qendrën e emigrantëve të Rocca di Pappa nën kujdesin e Kishës Katolike.
40 emigrantët e tjerë të anijes “Diciotti”vazhdojnë të qëndrojnë në qendrën e identifikimit të emigrantëve në Katania, ku gjysma do të nisen drejt Shqipërisë dhe pjesa tjetër drejt Irlandës.
Natën e 16 gushtit, anija e rojës bregdetare italiane “Diciotti” shpëtoi 177 emigrantët në ujërat e Mesdheut.
Pas disa ditësh në det të hapur e në pritje të një porti të sigurt për të zbarkuar, kjo anije u lejua të ankorohet në portin e Katanias.
Qeveria italiane fillimisht lejoi zbritjen vetëm të emigrantëve minorenë e për 4 ditë të tjera bllokoi zbarkimin e emigrantëve në tokë.
Pas apelit të institucioneve evropiane e të Papa Françeskut, negociatat e Ministrit të Jashtëm italian Enzo Moavero çuan në zgjidhjen e kësaj situate.
