Një ngjarje e rëndë ndodhi mëngjesin e sotëm para një lokali tek rrethrotullimi i Bradasheshit. 50-vjeçari Bujar Çela u ekzekutua me armë zjarri. Viktima është vëllai i Talo Çelës, një nga grabitësit e 4.6 mln eurove në aeroportin e Rinasit, më 9 prill të 2019.
Ngjarja e rëndë ka ndodhur në orën 05:45 të mëngjesit të sotëm, në një lokal tek rrethrrotullimi i Bradasheshit. 50-vjeçari u ekzekutua teksa po pinte kafenë e mëngjesit në lokal.
Autorët kanë qëlluar me breshëri plumbash në drejtim të tij.
Pas vrasjes, autorët janë larguar me shpejtësi nga vendi i ngjarjes. Pas minuta më vonë ata i kanë vënë flakën mjetit tip ‘Renault’ me targa AA 876 DC që përdorën gjatë atentatit.
Policia ndodhet në vendin e ngjarjes, dhe ka nisur menjëherë hetimet për identifikimin e kapjen e autorëve. Uniformat blu kanë ngritur postblloqe në hyrje dhe dalje të qytetit të Elbasanit, dhe në qytetet si Durrësi, Fieri dhe Tirana, për kapjen e autorëve.
Nuk dihen detaje të tjera për këtë ngjarje.
