Një pistë e re po hetohet nga Policia e Shtetit lidhur me ekzekutimin e 50-vjeçarit nga Fieri, Ahmet Toska. Burime nga uniformat blu thanë për ‘Panoramën’, se për vrasjen e 50-vjeçarit është marrë në pyetje edhe ish-i fejuari i vajzës së tij. 50-vjeçari u vra pak ditë më parë në lagjen e tij në Fier, pak metra pasi kishte dalë nga shtëpia, në sy të bashkëshortes së tij.
Paraprakisht dyshohet se Toska mund të jetë vrarë si pasojë e ndonjë konflikti, pas ndarjes së vajzës së tij. Ky detaj ende nuk është konfirmuar, ndërsa uniformat blu po vijojnë hetimet.
Nga 12 kamerat e sigurisë së zonës kanë pikasur agresorin, një të ri me kapuç që çalon. Gjithashtu të njëjtat burime nga grupi hetimor kanë bërë me dije se arma që është përdorur në këtë krim, është shumë e veçantë. Me një pistoletë të atij lloji, sipas grupit hetimor, janë kryer vetëm dy vrasje në Shqipëri.
Ngjarja u regjistrua rreth orës 06:00 në lagjen “Sheq i Madh” në Fier. 50-vjeçari, Ahmet Toska po shoqëronte bashkëshorten për në punë.
Mësohet se autori ka qenë i maskuar dhe e ka ekzekutuar me një plumb në kokë. Ndërkohë banorë të zonës shprehen se Toska nuk njihej si njeri problematik. Ata thonë se ai punonte në një pikë karburanti, ndërkohë që bashkëshortja e tij në një furrë buke.
