Reporteri gjerman për Shqipërinë në Asamblenë Parlamentare të Këshillit të Evropës, Andre Hunko është shprehur se vendi ynë mund të gjobitet dhjetëra mijëra euro, për shkak të ekstradimit të mësuesit turk.
Policia shqiptare e dorëzoi Harun Çelik, i njohur si një mbështetës e Gylen tek policia turke në aeroportin Nënë Tereza.
“Në përgjithësi unë jam shumë i shqetësuar për metodat që po përdor Turqia për të ekstraduar persona nga shtete të tjera. Kemi edhe rastin e Moldavisë ku ekstradimi u shpall në shkelje të konventës nga Gjykata Evropiane e të Drejtave të Njeriut ( Gjykata e Strasburgut) dhe Moldavia u detyrua të paguajë gjobë 25 000 € për çdo person. Fakti që je gylenist nuk është shkak ligjor për ekstradim në Turqi. Kështu e shohim këtë çështje në Gjermani”, tha ai.
Mësuesi turk u arrestua para 5 muajsh, teksa gjatë kohës që priste për gjyqin ai kërkoi azil politik në Shqipëri. Por kjo kërkesë iu mohua nga autoritetet.
Harun Çelik dyshohet të jetë një ‘Gulenist apo anëtar i organizatës FETO, për të cilën Presidenti turk Erdogan pretendon se ishte pas përpjekjes të grushtit të shtetit në 2016.
Që nga koha e grushtit të shtetit ai ka miratuar një goditje ndërkombëtare për këdo që ai beson se është i lidhur me lëvizjen.
Mediat turke bëjnë me dije se rreth 150,000 shërbyes civilë, oficerë policie, ushtarë, gjyqtarë, mësues dhe akademikë janë pezulluar, burgosur ose kapur para gjykatave, së bashku me mijëra gazetarë.
