Pasi qëndruan për më shumë se dy orë para Parlamentit deputetët e opozitës, ndjekur nga protestuesit shkuan drejt Kryesisë së Kuvendit. Për të dorëzuar zyrtarisht mandatet e tyre si deputetë. Gjë që është pritur me shumë entuziazëm nga protestuesit të cilët i prisnin në ambientet jashtë Kuvendit.
Më pas disa nga deputetët e shfrytëzuan momentin e daljes për të ndaluar e folur me qytetarët. Një prej tyre ishte dhe deputeti Ervin Salianji, i cili ndryshe nga kolegët e tjerë nuk shkoi drejt selisë së Partisë Demokratike, ku Basha bëri edhe mbylljen e protestës. Por, vendosi të qëndronte në bulevardin para Kryeministrisë, së bashku me disa nga protestuesit.
Në një prononcim për Tirana Today ai thotë se tani që është pa mandatin e deputetit ndjehet më mirë. Edhe pse kjo do të thotë më “i papaguar”.
“Tani që nuk jam më deputet vërtetë jam më i papaguar, por më shumë i mandatuar se herët e tjera. Është një moment i veçantë për gjithë historinë politike të Shqipërisë, por pa diskutim edhe më gjerë. Sepse ky është një akt i paprecedentë dhe i pa ndodhur më parë. Situata politike e krijuar dhe gjithë uzurpimi dhe mosfunksionimi i institucioneve, na ka çuar në këtë vendimmarrje.
Nuk besoj se arrihen qëllimet duke pasur vetëm mandate. Qëllimet i kanë arritur qytetarët dhe populli. Në vitin ’90 ishin gjithë qytetarët përballë gjithë institucioneve që ishin me parti shtet. Besoj që jemi në të njëjtën situatë dhe kështu do të vijë edhe rruga e zgjidhjes.”
Pyetjes së nëse do të rikandidojë sërish në rast zgjedhjesh të parakohshme, Salianji shprehet se po. Kjo pasi dorëzimi i mandateve sipas tij nuk do të thotë largim nga politika, përkundrazi është më tepër përfshirje.
“Ne nuk po kërkojmë pushtet, veç rregulla loje. Nëse do të ketë zgjedhje të parakohshme, padiskutim që do të rikandidoj. Ne jemi në politikë dhe nëse do të ketë qeveri transitore dhe zgjedhje të lira e të ndershme do të kandidoj. Kjo absolutisht që nuk është heqje dorë nga politika. Madje është përfshirje akoma më shumë.”/ TIRANA TODAY
