Kryeministri Edi Rama, gjatë qëndrimit të tij në Serbi, u shfaq mbrëmjen e djeshme në shoqërinë e presidentit serb, Aleksandër Vuçiç, kryeministrit maqedonas, Zoran Zaev dhe Ana Brnabiç, teksa dilnin për shëtitje në qytetin e Novi Sadit.
Në profilin e tij të “Instagram”-it, Vuçiç publikoi disa foto me liderët e tre shteteve të Ballkanit. Nga pamjet, ata dallohen të qetë, ndërsa nuk hezituan të lëshojnë batuta.
Në një moment, gazetarët iu drejtuan Vuçiçit, duke e pyteur se “Çfarë do të thotë ky takim për Ballkanin?”
Nga ana tjetër, presidenti serb shprehet: “Edi is the guy…”, duke ia lënë në këtë mënyrë fjalën Ramës. Ky i fundit e cilësoi “mahnitëse” faktin që ishin mbledhur të gjithë, në përpjekje për të çuar përpara atë që “është thënë shpeshherë në raste të ndryshme së bashku me miqtë tanë europianë”.
Kujtojmë se shefi i qeverisë mbërriti në Serbi ditën e djeshme, pasi këtë të enjte pritet të nënshkruhet marrëveshja e të ashtuquajturës “Shengen Ballkanik”.
Bëhet fjalë për një marrëveshje bashkëpunimi për heqjen e barrierave për bizneset dhe lehtësimin e lëvizjes së njerëzve e shërbimeve.