Serbia ka regjistruar sot një bilanc tragjik të numrit të personave që kanë humbur jetën nga koronavirusi.
Kryeministrja Ana Brnabiç tha se gjatë 24 orëve të fundit janë shënuar 18 viktima nga COVID-19. Ajo e cilësoi këtë të premte si ditën më të rëndë që nga fillimi i pandemisë.
“Deri më tani situata më kritike është në Beograd, pastaj Kragujevc dhe Novi Pazar. Ne po shohim rritje dramatike të numrit të të infektuarve dhe përkeqësim të situatës epidemiologjike në të gjithë rajonin dhe në mbarë botën”, tha ajo.
Sipas Brnabiç, aktualisht në spitalet e Serbisë po trajtohen me respiratorë 130 pacientë. Deri më tani, Serbia ka regjistruar mbi 17 mijë të infektuar me koronavirus dhe 370 viktima.
