Cheung Tze-keung, ka qenë një ndër gangsterët më famëkeq të Hong-Kongut, qendra kryesore financiare në Azi. Ai njihej ndryshe edhe si “Big Spender” (Xhepshpuari), për shkak të shpenzimeve të mëdha që bënte.
Cheung lindi në prillin e vitit 1955 në provincën kineze Guangdong, teksa u transferua në Hong Kong me familjen e tij që në moshën 4-vjeçare. Në dallim nga shumica e gangsterëve më të njohur, ai nuk ishte anëtar i Triadës, mafies së mirënjohur kineze.
Madje thuhej se pjesëtarët e Triadës, dridheshin nga frika sa herë e ndeshnin Cheung në ndonjë tavolinë kazinoje. Ata e cilësonin si një njeri të krisur. Cheung Tze-keung, u njoh me botën e krimit nga babai i tij, që merrej me lojërat e paligjshme të fatit.
Cheung u fut për herë të parë në burg në moshën 16-vjeçare, teksa e kaloi pjesën më të madhe të rinisë së tij sa brenda dhe jashtë qelisë, duke u bërë shpesh pjesë e luftës me bandave rivale në rrugë, apo dhe qendrat e paraburgimit. Aktiviteti kryesor i bandës së tij, ishin rrëmbimet e njerëzve, grabitjet dhe kontrabanda e armëve.
Cheung Tze-keung u bë i famshëm përtej Hong Kongut, kur organizoi në majin e vitit 1996 rrëmbimin e Viktor Li, djalit të Li Ka Shing, biznesmenit më të pasur të qytetit, dhe njërit prej njerëzve më të pasur në botë. Në fillim ai i kërkoi Ka Shingut 200 milionë dollarë, në këmbim të lirimit e të birit.
Pas disa negociatash, Cheung mori vetëm 130 milionë dollarë në para të thata nga Li Ka-shing,. Pas 3 ditësh ai e liroi Viktor Li-në. Kjo shumë ishte më e madhja e marrë ndonjëherë nga një pengmarrës. Për çudi, Cheung Tze-keung i telefonoi pak orë më vonë biznesmenit Li Ka-shing, për t’i kërkuar një këshillë se ku duhet t’i investonte paratë e shpërblesës, që sapo kishte marrë nga rrëmbimi i djalit të tij.
Në një intervistë dhënë disa vite më vonë, Li kujton se i rekomandoi gangsterit të ndryshonte mënyrën e jetesës. “Ju keni marrë mjaftueshëm para, për t’i shpenzuar ato për pjesën e mbetur të jetës tuaj. Ndaj keni ende shanse që të ktheni rrugë, dhe të bëheni një njeri i mirë. Nëse vazhdoni të jetoni në këtë mënyrë, fundi juaj do të jetë i trishtueshëm”- i tha biznesmeni pengmarrësit të birit.
Në kohën e ngjarjes, Li u kritikua në atë kohë për mos paraqitjen e një raporti policor. Ndërkohë në vitin 1999, biznesmeni përgënjeshtroi zërat se kishte arritur një marrëveshje me autoritetet kineze, që çoi në ekzekutimin me vdekje të Cheung, dhe 4 anëtarëve të bandës në dhjetorin e vitit 1998 për krime të ndryshme përfshirë vrasjen, rrëmbimet, grabitjet dhe kontrabandën e eksplozivëve.
Pavarësisht këshillës, Cheung vazhdoi të bënte gjithmonë një jetë të shpenguar. Ai humbte shuma të mëdha në kazino. Vendi i tij i preferuar ishin kazinotë e Makaut, ku mblidhen zakonisht për të luajtur shumica e bosëve të krimit nga Azia. Vetëm në një rast ai raportohet të ketë humbur 18 milionë dollarë.
Ndërkohë ai ishte bujar edhe me shumë njerëz, të njohur apo të panjohur. Gangsteri ishte gjithmonë tërësisht i vetëdijshëm për rrugën e zgjedhur. “Unë s’kam durim që të punoj për të jetuar. Në këtë botë, paraja është gjëja më e rëndësishme. Dhe unë zgjedh mënyra jo të zakonshme për ta fituar atë”- është shprehur në një rast
Në një rast thuhet se kur ishte në Bankok të Tajlandës, ai i dhuroi dhjetëra mijëra dollarë një piktori të ri që punonte në rrugë. Pak kohë para se të arrestohej, ai shpenzoi 1 muaj në një hotel luksoz në Shenzhen, gjatë së cilës “lau me para” në formën e bakshisheve të gjithë stafin e hotelit.
Cheung u arratis në Kinën kontinentale në janarin e vitit 1998, pasi nuk arriti të rrëmbente Sekretarin e Administratën Anson Chan, në shenjë hakmarrjeje për burgosjen e bashkëpunëtorit të tij, Yip Kai-foon. Por pas një operacioni blic, policia zbuloi 818 kg eksploziv në Sheung Shui, një zonë e Hong Kongut, dhe e akuzoi Cheung se kishte planifikuar bombardimin e godinave qeveritare.
Cheung u fsheh për disa kohë në provincën e vendlindjes së tij, Guangdong, nën një emër të rremë, pasi kishte korruptuar policinë lokale. Ai ra gjithsesi në prangat e policisë në gushtin e vitit 1998, bashkë me 35 anëtarët e bandës së tij. Në momentin e arrestimit, Cheung po planifikonte të rrëmbente magnatin e lojërave të fatit të Makau, Stanley Ho.
Gjyqi u zhvillua në Guangzhou, edhe pse krimet e tij ishin konsumuar në Hong Kong. Avokati i Cheung, kërkoi që gjyqi të transferohej në Hong Kong, por kjo kërkesë u hodh poshtë. Më 12 nëntor 1998, Cheung u shpall fajtor dhe dënua me vdekje. Ai u ekzekutua nga një togë pushkatimi më 5 dhjetor 1998./ TIRANA TODAY
