Kryeministri në detyrë i Kosovës, Ramush Haradinaj, ka kërkuar që në ditën e parë të fillimit të punës së Asamblesë Gjenerale, që të shtyhet aplikimi i Kosovës për anëtarësimin në INTERPOL, deri vitin tjetër.
Duket se ka ardhur edhe përgjigja e kësaj organizate e cila ka treguar për Gazetën Express se ka pranuar dje kërkesën e Republikës së Kosovës për shtyrje të aplikimit.
“Më 15 tetor, INTERPOL ka pranuar një letër nga autoritetet në Kosovë se për shkak të ndryshimeve në qeveri, ata dëshirojnë që të shtyjnë aplikimin e tyre për anëtarësim deri në vitin tjetër kur do të mbahet Asambleja Gjenerale e radhës. Bazuar në këtë, kjo çështje nuk do të merret në konsideratë përgjatë punimeve të Asamblesë Gjenerale të 88-të që po mbahen në Santiago të Kilit”, thuhet në përgjigjen e INTERPOL.
Kërkesa për shtyrjen e aplikimit kishte ardhur si pasojë e tranzicionit ku gjendet aktualisht vendi, pas zgjedhjeve që u mbajtën më 6 tetor.
Denonco ne TT