Dy përfaqësues të mazhorancës priten që të shpallen “non grata” nga DASH. Siç duket, amerikanët do të hedhin hapin e radhës, ku pas ish-kryeministrit Berisha kanë kthyer sytë nga socialistët.
Dy deputetë nga radhët e të majtës, do të shpallen së shpejti si persona “non grata” nga Departamenti Amerikan i Shtetit (DASH), duke iu shtuar një liste personalitetesh tashmë në listën e zezë të amerikanëve.
Këtë detaj e kanë përcjellë burime të “Albanian Post”, por për arsye sigurie nuk mund të japë detaje të tjera. SHBA-të mbeten të vendosura për të demaskuar publikisht politikanët dhe pushtetarët shqiptarë të përfshirë në korrupsion, afera apo krim të organizuar. Në 19 maj të këtij viti, Sekretari Amerikan i Shtetit, Antony Blinken, ka shpallur “non grata” ish-kryeministrin Sali Berisha dhe familjen e tij.
DASH ka publikuar në faqen zyrtare vendimin e plotë, ku thuhet se Berisha ka qenë i përfshirë në veprime korruptive për shpërdorim të fondeve publike dhe ndërhyrje në proceset publike, duke përdorur pushtetin. Por pas ish-kryeministrit Berisha, amerikanët kanë shënjestruar mazhorancën, zyrtarë të së cilës pritet në shpallen të padëshiruar. Referuar asaj që shkruan “Albanian Post”, radhën e kanë dy të tjerë. Mbetet për tu parë në ditët në vijim, se kush janë ligjvënësit socialistë që do të shpallen “non grata” nga DASH.
