Dy familje nga Thumana që humbën njerëzit e tyre nën rrënojat e banesave që u shembën nga tërmeti i 26 nëntorit janë akomoduar në banesat sociale në Tiranë.
Familja Vata, e cila përbëhet nga pesë anëtarë u sistemua nga Bashkia e Tiranës në një hapësirë 1+3 banimi. Po ashtu, edhe familja Kabili, e cila përbëhet nga tre anëtarë, u akomodua në një hapësirë 1+2.
Këto dy familje u vizituan mbrëmjen e sotme nga kryeministri Edi Rama dhe kryebashkiaku Erion Veliaj. Teksa garantuan se institucionet shtetërore do jenë gjithmonë në mbështetje të tyre për të kaluar sa më lehtë këtë fatkeqësi dhe për t’u riintegruar në jetën e përditshme.
“Më vjen shumë keq për atë që ndodhi, ne do të bëjmë, gjithçka që kemi në dorë që t’jua lehtësojmë ca barrë që ju ra. Kemi marrë disa vendime për familjet e viktimave dhe besoj që nga pikëpamja e mbështetjes financiare do të jeni pa pasur dhimbje koke për të realizuar ato nevoja bazike të familjes. Edhe fëmijëve do ju japim bursë. Jetën e atyre që ikë nuk i kthejmë dot por jetët tuaja do jua lehtësojmë sa të jetë e mundur. Ne do të jemi për çdo gjë në dispozicion. Ne do ti rregullojmë të gjithë familjet e viktimave brenda kësaj jave”, tha Rama.
