Një aksident rrugor ka ndodhur vetëm pak minuta më parë në aksin Fier–Patos, në vendin e quajtur “Portëz”, pranë Fierit.
Sipas informacioneve të para nga vendngjarja, një automjet tip “Renault” është përplasur me një makinë tip “Golf”, çka ka bërë që mjeti “Renault” të dalë nga rruga dhe të përfundojë në kanalin anësor.
Fatmirësisht, drejtuesi i automjetit ka shpëtuar pa lëndime serioze, duke iu shmangur një tragjedie të mundshme. Në vendngjarje ka mbërritur edhe një zjarrfikëse për të ndihmuar në nxjerrjen e mjetit nga kanali.
Ndërkohë, forcat e policisë dhe grupi hetimor po punojnë për të zbardhur rrethanat dhe shkaqet e këtij aksidenti, i cili ka shkaktuar dëme të konsiderueshme materiale.
