Një zjarr masiv ka përfshirë spitalin e Durrësit në orët e para të mëngjesit të sotëm. Mësohet se një shkëndijë elektrike në kabinën e spitalit ka shkaktuar zjarr dhe tym në katin e parë të spitalit. Më pas është djegur tërësisht rrjeti elektrik deri në katin e katërt duke vënë në rrezik jetën e personelit dhe pacientëve. Mësohet se rreth 80 persona janë evakuar nga spitali.
Pasi policia dhe zjarrfikëset kanë bërë evakuimin, prokuroria e Durrësit është vënë në lëvizje. Mësohet se mëngjesin e sotëm ka mbërritur dhe grupi hetimor që po grumbullon prova për të gjetur përgjegjësit për ngjarjen, që mund të ishte shndërruar një një katastrofë me dëme të mëdha njerëzore.
Prokurorja Pranvera Gruda ka sekuestruar dosjet e rrjetit, ndërhyrjet dhe raportet e mirëmbajtjes së paneleve që u shkrumbuan nga flakët. Grupi hetimor ka kërkuar edhe raportin e kolaudimit të bombolave të shuarjes së zjarrit, planin e emergjencës dhe informacion nëse ka apo jo sistem sensorësh për zjarrin.
