Ambasada Amerikane në Tiranë ka sjellë në kujtesë tërmetin e 26 nëntorit të vitit të kaluar që goditi Shqipërinë. Në njoftimin e shpërndarë në faqen zyrtare në Facebook, thuhet ndër të tjera se SHBA kanë qenë me shqiptarët në çdo hap të kësaj rruge, dhe do të vazhdojnë të na mbështesin.
Ambada citon se Shqipëria ka treguar një forcë të jashtëzakonshme jo vetëm në rindërtim, por edhe në përballjen me një pandemi globale. Në 26 nëntor, Tirana, Durrësi, Laçi, Lezha, Thumana dhe disa qytete të tjera të vendit, u tronditën nga tërmeti më i fortë në 40 vitet e fundit.
51 persona humbën jetën nën rrënoja. Ishte ora 03:54 kur toka shqiptare u “shkund” nga tërmeti me magnitudë 6.4, me epiqendër 16 kilometra në perëndim-jugperëndim të Mamurrasit, por që u ndje deri në Beograd, 370 kilometra larg epiqendrës.
Njoftimi
“Në 26 nëntor bëhet një vit qëkur një tërmet goditi Shqipërinë. Shtetet e Bashkuara qëndrojnë në solidaritet me popullin shqiptar, ndërsa ju përkujtoni këtë përvjetor solemn. Përgjatë vitit të kaluar, Shqipëria ka treguar një forcë të jashtëzakonshme, jo vetëm në rindërtim, por edhe në përballjen me një pandemi globale. Shtetet e Bashkuara kanë qënë me ju në çdo hap të kësaj rruge dhe do të vazhdojmë të jemi me ju”.
