Pas protestës së djeshme, Berisha ka ashpërsuar tonet ndaj kryetarit të PD-së, Lulzim Basha. Në një konferencë për mediat nga seli blu, Berisha ka zbuluar se kryedemokratit Basha do t’i dërgohet një shkresë zyrtare për shkarkimin e tij. Nga selia blu ku u fut me dhunë, ish-kryeministri ka njoftuar mbi vendimet e Komisionit për rithemelimin e PD-së, ku tha se një prej tyre është edhe njoftimi me shkrim i Bashës për shkarkimin. Ai paralajmëroi Bashën që të mos ‘imagjinojë’ t’i kundërvihet këtij vendimi.
“Ndërkohë Komisioni vendosi t’i komunikojë deputetit Lulzim Basha vendimet supreme të anëtarësisë së PD në aktin më historik të lirisë, siç ishte referendumi. Ky akt ishte shkarkimi. Si një akt protokollar dhe jo detyrim, sepse e shpall para të gjithë shqiptarëve. Deputetit Basha do i dërgohet shkresë për këtë vendim.
Komisioni vendosi që të njoftojë se anëtarësia e PD është në këmbë, dhe e vendosur të zbatojë vendimin e saj. Vendimi i marrë do zbatohet pa asnjë lloj hezitimi. Paralajmëroj këtu deputetin Basha të mos e imagjinojë t’i kundërvihet vendimit të referendumit. Anëtarët kanë vendosmëri absolute për këtë vendim. Komisioni do të bëjë detyrën e tij për zbatimin e vendimit”, tha Berisha.
