Gazetari Armand Shkullaku ka komentuar “përplasjen” mes kryeministrit Edi Rama dhe kryebashkiakut Erion Veliaj këto ditë, veçanërisht kur vizituan familjen Lala në banesën e tyre të re. Në një moment, kreu i qeverisë i kërkoi Veliajt që të dilte të nesërmen që në 4:30 nga shtëpia e të lyejë shkallët e pallatit.
I ftuar këtë të enjte në emisionin “Opinion”, Shkullaku u shpreh se i erdhi keq për Veliajn në atë moment. Ndërsa e konsideroi akoma më të rëndë kur mohoi që ato fjalë i ishin adresuar atij.
“Për herë të parë më erdhi keq për Veliajn, ajo që bëri pastaj Veliaj që doli në Top Channel dhe tha se nuk e kishte me mua e kishte me administratorin e pallatit është më e rëndë akoma. Dhe dinjiteti njerëzor ka një kufi, të paktën ta kalonte në heshtje”, tha Shkullaku.
Po ashtu, daljet publike në media të kryeministrit i kanë komentuar edhe analistë të tjerë:
Andi Bejtja: Siç e ka thënë dhe Lubonja, Rama sillet njësoj si në dasmë si në mort, po ta shikojë njeri pas 30 viteve këto video do duket sikur s’ka pasur asnjë viktimë nga tërmeti. Këto humore mund t’i duken dikujt të lezetshme, por janë katastrofë. Kjo situatë nuk besoj se i ka sjellë avantazh. Nëse këto shqiptarëve iu duken normale, ai është i turpshëm. Dhe në fund të këtyre videove, ai merret me mediat.
Mustafa Nano: Fajin nuk e ka Rama, por televizionet që e transmetojnë. Ai do dali i favorizuar nëse për disa muaj do ketë rezultate konkrete të kapërcimit të këtij momenti dramatik. Ramës unë i jap vetëm një meritë, në planin e sensibilizimit ndërkombëtar ka ditur të punojë. E kemi parë tek RAI, e kemi parë në Turqi. Kemi parë Macron, këtu i njoh merita. Në sjelljen e brendshme mua më duket bezdisëse.
