Dje sapo kishin rihapur biznesin, vëllezërit Haxhia u qëlluan nga një “Toyota” gri

Një ngjarje e rëndë u regjistrua ditën e djeshme në Durrës, ku dy vëllezër u gjetën të vrarë në makinën e tyre.

Vrasja raportohet të ketë ndodhur dje rreth orës 16:40, te tregu i makinave në qytetin bregdetar. Dy vëllezërit Besmir dhe Viktor Haxhia u qëlluan teksa po lëviznin me makinën e tyre tip “Golf”.

Ndërkohë mësohet se nga këqyrja e kamerave të sigurisë është zbuluar se ka qenë një “Toyota” ngjyrë gri e errët, nga ku është qëlluar. Policia ka sekuestruar pamje të kamerave të sigurisë gjatë rrugës. Në to shihet se si makina e vëllezërve Haxhia është qëlluar nga dy persona, ku janë derdhur dhjetëra plumba kallashnikovi.

Sipas grupit hetimor, dy vëllezërit ishin qëlluar në kokë dhe në trup. Rreth 40 dëshmitarë okularë, bashkëpunëtorë biznesi dhe të afërm janë shoqëruar në polici për të zbuluar konfliktet që mund të kishin.

Dy vëllezërit, Besmir dhe Viktor Haxhia ishin me origjinë nga Puka por banonin në Durrës. Ata kishin në pronësi një pikë ‘Exchange’ dhe dërgesash të parave, makina me qira dhe shërbim karotreci në Spitallë. Ndërkohë që dje ishte dita e parë që ata kishin rihapur edhe aktivitetet e biznesit.

Policia vijon ende hetimet për zbardhjen e plotë të ngjarjes dhe identifikimin e kapjen e autorëve