Këshilltarja për media e presidentit të Serbisë, Suzana Vasiljeviç, ka dhënë detaje rreth takimit që Aleksander Vuçiç ka pasur me emisarin e Trump për dialogun Kosovë-Serbi, Richard Grenell.
Ajo ka thënë se një takim i tillë ka qenë jashtëzakonisht sfidues, megjithatë ka thënë se nuk mund të lëshohet në detaje, rreth asaj që është biseduar, raporton Gazeta Express.
Vasiljeviç ka thënë se në dhjetë minutat e parë në takim kanë qenë kokë më kokë, vetëm Vuçiç dhe Grenell, dhe më pas në takim është bashkuar edhe drejtori i të ashtuquajturës Zyrë për Kosovën, Marko Gjuriq.
Vasiljeviç ka thënë se ajo që ka qenë e pazakontë nga takimi me emisarin e Trump, është që Vuçiç ka mbajtur shënime edhe për veten e tij, gjë që, sipas saj, nuk kishte ndodhur asnjëherë më parë.
“Çfarë ishte e pazakontë, ishte që presidenti po mbante shënime edhe për veten e tij për herë të parë. Bisedimet duket se ishin jashtëzakonisht të vështira”, ka thënë ajo.
Përveç tjerash Vasiljeviç ka thënë se pas takimit me Grenell ka qenë në një disponim jashtëzakonisht të keq, sa që nuk ka folur me asnjë prej stafit për disa minuta.
Këshilltarja e Vuçiç ka thënë se edhe më parë ka ndodhur që takimet rreth çështjes së Kosovës të jenë të vështira, megjithatë thotë se asnjëherë në atë nivel të vështirësisë sa që presidenti të mos flasë me asnjë prej bashkëpunëtorëve të tij.
Tutje, Vasiljeviç ka thënë se Vuçiçit i janë dashur disa minuta që të mendojë e ta marrë veten dhe të zbërthejë gjithë atë që e ka dëgjuar nga Grenell.
Më pas nga zyra e Vuçiçit, pas takimit me Grenell është lëshuar një komunikatë në të cilën thuhej se Vuçiç i ka thënë emisarit të Trump se një kompromis që do të jetë në interes të stabilitetit dhe të ardhmes së rajonit, mund të arrihet duke respektuar interesat legjitime të Serbisë.
Në këtë njoftim është cituar Grenell i cili ka thënë se dy palët “duhet të bashkëpunojnë shpejt dhe ngushtë, duke shikuar drejt të ardhmes”./GazetaExpress
