Pak çaste më parë u dha vendimi për shkarkimin nga detyra të Konsullit të Republikës së Kosovës në Shqipëri, Halim Krasniqi, me argumentin se ka ushtruar dhunë fizike ndaj punonjësve.
Dekreti mban firmën e presidentes në detyrë, Vjosa Osmani. Një vendim të tillë, Halim Krasniqi e cilëson anti-kushtetues. Në një prononcim për ‘Abcnews.al’, Krasniqi shprehet se akuza nuk është e vërtetë, dhe se vendimin do ta dërgojë në Gjykatën Kushtetuese.
Ai deklaroi se këto janë akuza të pabazuara në fakte, të marra nga një portal në Tiranë, që ka folur me dashakeqësi. Po sipas tij, në Konsullatë nuk ka patur asnjë shkelje nga ana e tij, ku nënvizon se është punuar me përkushtim edhe gjatë periudhës së pandemisë. Halim Krasniqi vendos pikat mbi ‘I’, teksa shton se vendimin në fjalë e cilëson si një hakmarrje politike nga presidentja Vjosa Osmani.
“Këto janë akuza të pabaza, të marra nga një portal në Tiranë, por nuk ka asgjë të vërtetë. Në Konsullatë nuk ka pasur asnjë aferë, është punuar me përkushtim edhe në kohën e pandemisë.
Ne jemi familje e luftës, kemi punuar për drejtësi dhe këtë vendim të pabazë do ta dërgoj në Gjykatën Kushtetuese. Vendimin e cilësoj edhe si hakmarrje politike nga Vjosa Osmani, që po largon edhe njerëz të tjerë të emëruar nga Hashim Thaçi.
Unë jam i pastër dhe vendimin do ta dërgoj në gjykatë, nuk ka asgjë të vërtetë në atë që shkruhet”, përfundoi ai.
