Trazirat që ndodhën në ndeshjen e parë të kampionatit shqiptar mes Skënderbeut dhe Partizanit vërtetuan se largimi i policisë nga stadiumi nuk funksionon. Të dy tifozeritë u përleshën mes tyre duke hedhur gurë dhe duke shkatërruar stadiumin. Por tashmë njëra palë do të mbetet përgjegjëse për këtë incident dhe mes dy klubeve ka filluar një ‘luftë’, ku akuzat ndaj njëri-tjetrit nuk kursehen.
Klubi i kuq në reagimin e tij dënon dhunën dhe mbështet “fair-play”-n, por thekson se prezenca në stadium e stjuartëve është detyrim ligjor që pas ndryshimit të tij. “Saktësojmë se klubi ynë nuk pajtohet kurrsesi me ngjarje të tilla të cilat prishin imazhin dhe nuk i shërbejnë futbollit të luajtur dhe Fair Play- it në fushë dhe tribuna.
Përgjatë gjithë ditëve të fundit episodet e shfaqura në Korçë janë komentuar si dështim i eksperimentit pa prezencën e forcave të rendit. Fakt është se prezenca e stjuartëve privat në stadium nuk mund të quhet eksperiment nga momenti kur është bërë ndryshimi i ligjit dhe rolin kryesor në mbarëvajtjen e garës e ka klubi pritës. Theksojmë se klubi Partizani për vite me radhë ka zbatuar me rigorozitet dhe korrektësi organizimin dhe mbarëvajtjen e ndeshjeve në kryeqytet, duke mos shënuar qoftë edhe incidentin më të vogël, i cili cenon aktivitetin apo garën sportive”,–shkruhet në një pjesë të deklaratës.
Ndërsa nga ana tjetër klubi i Skënderbeut ka kërkuar një hetim të detajuar, pasi është një grup njerëzish që sipas tyre kanë mbështetje me prapavijë politike dhe shkaktojnë trazira në cdo stadium: E Ripërsëritur!
Duke marrë shkas nga ngjarjet e ndodhura ditën e premte gjatë zhvillimit të ndeshjes Skënderbeu – Partizani, në Stadiumin ‘Skënderbeu’ dëshirojmë të reagojmë dhe kërkojmë nga autoritetet përkatëse zbardhjen e çështjes dhe nxjerrjen para ligjit të autorëve.
Bilanc lufte në 4 vitet e fundit! Ata që viktimizohen dhe përgjegjësinë e tyre prej vitesh e adresojnë tek të tjerët duke trilluar dhe skenarë të formave të ndryshme në 4 vite e fundit gjatë transfertave në Korçë kanë shkaktuar minimalisht 3 milion lekë dëme materiale dhe me dhjetra të plagusur.
Kur do vijë momenti që përgjegjësia t’iu kalojë atyre që shkaktojnë trazira? Atyre që dhunojnë, shkatërojnë stadiume dhe rrezikojnë jetën e qindra fëmijëve dhe sportdashësve të tjerë të cilët 90’ minutat e takimit i shohin vetëm si mënyrë argëtimi dhe jo lufte.
KF Skënderbeu bën thirrje për implementimin e plotë të ligjit për sportit dhe individualizimin e përgjegjësisë. Nuk mund të vijohet më me dënime kolektive që demtojnë produktin tonë dhe investimet e klubeve.
Nuk mund të jenë ende të paprekshëm grupime me prapavijë dhe mbështetje politike, i njëjti grupim që shkaktoi trazirat ditën e premte në Korçë duke përfituar nga paprekshmëria kanë shkaktuar të njëjtin incident thuajsë në të gjitha stadiumet e Kategorisë Superiore.
Është fakt! E njëjta tifozëri, ka shkaktuar incidente të ngjashme edhe me prezencën e forcave të policisë në pjesën e brëndshme në stadiumit duke përfituar nga paprekshmëria dhe duke qënë vazhdimisht të privilegjuar nga mbështetja politike.
Në dijeninë tonë, incidenti i ndodhur në stadiumin ‘Skënderbeu’ ditën e premte po hetohet nga prokuroria e rethit Korçë.
Nisur nga ky fakt, KF Skënderbeu i kërkon Komisionit të Disiplinës pranë FSHF të presë zbardhjen e çështjes nga ana e Prokurorisë në lidhje me incidentin në fjalë dhe po ashtu kërkojmë nga Prokuroria e rethit hetimin me një standart të dy tifozërive dhe jo vetëm të grupimit bardhekuq në mënyrë që të dalin përgjegjësit e vertetë të incidentit.
Në stadiumet Shqiptare nuk mund të ketë më të paprekshmëm me prapavije politike. Ata që prej vitesh dëmtojnë investimet tona, dhunojnë pronën privatë, prishin qetësinë publike dhe mbi të gjitha largojnë tifozët nga stadiumet.
Me respekt,
KF Skënderbeu
