Kryeministri Rama është ndalur sot tek rasti i dhunës së gazetares Anila Hoxha dhe operatorit Endri Aga, gjata raportimit të lajmit për vrasjen e biznesmenit Ruzhdi Hoxha, ku e ka cilësuar sjelljen e policit të patolerueshme. Kreu i qeverisë vuri në dukje se figura e Policisë së Shtetit nuk mund të dëmtohet nga disa individë, që nuk e meritojnë të jetë pjesë e policisë.
“Për faktin se vajza ishte gazetare, ngjarja u bë e bujshme. Është e rëndësishme që të veprohet siç u veprua me shpejtësi dhe pa tolerancë ndaj këtyre individëve, duke i larguar. Duhet të theksohet se figura e policisë nuk ka nevojë për asnjë gjest dhe asnjë fjalë të tepërt, sepse është mishërimi i ligjit dhe ligji nuk kërcënon, nuk shan, ligji vepron. Në veprimin e ligjit është e tepërt të shtohen gjeste dhe të bëhen akte që i ulin kokën të gjithë punonjësve të Policisë së Shtetit, për shkak të dikujt që nuk e meriton të jetë kolegu apo kolegia e tyre”, tha Rama.
Gazetarja po raportonte detajet e ekzekutimit të biznesmenit Ruzhdi Hoxha që ishte zhdukur prej disa ditësh, ndërsa në një moment, u shty nga një efektiv.
Efektivi ishte i nevrikosur nga fakti që mediat kishin kaluar shiritin e policisë, dhe reagoi me tone të ashpra duke shtyrë gazetaren dhe operatorin. Ata u rrëzuan në tokë, në anë të një gremine. Gazetarja Anila Hoxha pësoi lëndime dhe gërvishtje nga sjellja brutale e policisë.
“Polic je ti ore. Çfarë je ti? Debil”, i thotë gazetarja Anila Hoxha efektivit, pasi rrëzohet në tokë.
Ndonëse i rrëzoi, polici nuk ofroi në asnjë moment ndihmën e tij për të ngritur gazetaren dhe operatorin që u lënduan.
