Tetë punonjës të Forcave të Ndërhyrjes së Shpejtë, të cilët ushtruan dhunë ndaj sekretarit organizativ të PD-së, Sahit Dollapi në protestën e 11 majit, po hetohen nga Prokuroria e Tiranës.
“Nga kqyrja e pamjeve vihet re një person civil, i identifikuar si Sahit Dollapi, i cili komunikon me një punonjës policie dhe më tej shkëputet nga ai dhe fillon të vrapojë. Pasi bën disa metra me vrap, rrëzohet në rrugë. Më tej, vërehet se një grup punonjësish policie, të veshur me pajisjet mbrojtëse, afrohen me vrap drejt Sahit Dollapit, tashmë i rrëzuar dhe e godasin me shkop gome disa herë. Pas këtij momenti, Sahit Dollapi ngrihet në këmbë i shoqëruar me një grup prej 7-8 punonjës policie të repartit FNSH”, shkruhet në dokumentin e Prokurorisë, sipas “Report tv”.
Kujtojmë, se një ditë pas protestës, lidhur me këtë rast ka reaguar edhe ministri i Brendshëm, Sandër Lleshaj dhe kryeministri Edi Rama, teksa e kanë konsideruar të panevojshëm veprimin e policisë ndaj përfaqësuesit politik të Partisë Demokratike.
