Alkond Bengasi është bashkëpunëtori i parë i policisë, që ka pranuar të japë detaje lidhur me grabitjen e 9 prillit, ku u morën disa milionë euro në Rinas.
Ai ka “zbërthyer” grupin e megagrabitjes, ndërsa tregon se si pranoi të modifikonte furgonët me shkrimin “Hetimi tatimor”, me të cilët u krye grabitja.
Bengasi thotë se kanë qenë kushërinjtë e tij Klement dhe Eldi Çala ata që ia kanë kërkuar një gjë të tillë. Pranon se është takuar me Muratajn dhe dy persona të tjerë nga Kosova të cilët iu kanë dorëzuar pas një dreke furgonët që do të modifikonin, raporton BalkanWeb.
“Kontaktin e parë e kam pasur me kushërinjtë e mi Klement dhe Eldi Çala. Duke qenë se unë punoja në një servis ata më kërkuan t’i shoqëroja në Kavajë ku do të merrnim një furgon. Fillimisht nuk pranova sepse kam pasur fëmijën sëmurë dhe nuk doja të largohesha nga Elbasani. Por më pas pranova dhe shkuam të tre tek Shkëmbi i Kavajës. Aty na prisnin tre persona për drekë. Një u prezantua si Admir Murataj i cili ishte në shoqërinë e dy personave nga Kosova. Një prej tyre e thërrisnin “daja” ndërsa tjetrin “Tani”. Pasi hëngrën drekë, morëm furgonat Shevrioletë, të cilët unë më pas i modifikova. Më vonë mësova se mjetet do të përdoreshin për grabitje”,- ka thënë Alkond Bengasi.
