Deputetja Rudina Hajdari ka reaguar lidhur me marrëveshjen e koalicionit opozitar, që ka braktisur Kuvendin dhe kërkon largimin e Ramës, krijimin e një qeverie tranzitore dhe mbajtjen e zgjedhjeve të parakohshme.
Në një postim në faqen e saj në Facebook, Hajdari e cilëson “fatalitet politik” marrëveshjen ndërmjet partive politike të opozitës, ku theksohet mospjesëmarrja në zgjedhjet e 30 qershorit.
“Marrëveshja ndërmjet partive politike të opozitës, ku ndër të tjera theksohet fakti i mospjesëmarrjes në zgjedhjet e 30 Qershorit, e shikoj si një fatalitet politik”, e nis reagimin e saj Hajdari, duke i dhënë drejtpërdrejtë një “shuplakë” vendimin të partisë më të madhe opozitare.
Më tej, deputetja nuk lë mangët as mazhorancën, teksa e kritikon atë si përgjegjëse të kësaj gjendjeje.
Në fund të reagimit, Hajdari kërkon reagimin e të gjithë “demokratëve të ndershëm” që e duan të ardhmen e Shqipërisë.
“Sa nuk është vonë, të gjithë demokratët e ndershëm, dhe të gjithë ata që duan të ardhmen e Shqipërisë, nuk duhet të qëndrojnë indiferentë, por të ulen në tryezën e bisedimit për të gjetur zgjidhjen e shumë pritur”, përmbyll postimin e saj deputetja.
Reagimi i plotë:
Marrëveshja ndërmjet partive politike të opozitës, ku ndër të tjera theksohet fakti i mospjesëmarrjes në zgjedhjet e 30 Qershorit, e shikoj si një fatalitet politik.
Nga ana tjetër, indiferencën e maxhorancës qeverisëse për situatën e krijuar dhe uria absolute e saj për të gllabëruar çdo ditë pushtet, nuk përbën gjë tjetër, veçse shkakun e drejtë për drejtë të kësaj gjëndjeje.
Natyrisht që kriza politike nuk lindi muajtë e fundit, kur deputetët e opozitës ndërmorën veprimin e djegies së mandateve. Kjo krizë ishte në thellësi të mentalitetit “old school”, të drejtuesit të maxhorancës, i cili ndoqi drejtimin antikushtetues të “mohimit qënësor”, ose të “mohimit ekzistencial” të opozitës, duke gllabëruar të gjithë pushtetet kushtetuese të pavarura, duke shtrirë influencën në brendësi të organeve të drejtësisë, dhe duke mos lënë as hapësirën më të vogël për të bërë opozitë konstruktive.
Përdorja e pushtetit dhe instrumentat e shtetit, për të blerë vota dhe median, për të goditur kundërshtarët politikë duke e trajtuar opozitën si “armiku” që duhet të shkatërrohet, po e fut vendin në një kaos ku autorëve po i vjen dita e gjykimit.
Kjo krizë në qoftë se do të vazhdojë edhe pak do ta çojë vendin në greminë, dhe politikanë të papërgjegjshëm, po përpiqen t’ia faturojnë shpatullave të lodhura të shqiptarëve nga aventurat politike “të të zgjedhurve”.
Sa nuk është vonë, të gjithë demokratët e ndershëm, dhe të gjithë ata që duan të ardhmen e Shqipërisë, nuk duhet të qëndrojnë indiferentë, por të ulen në tryezën e bisedimit për të gjetur zgjidhjen e shumë pritur.
