Në gjykatën e Elbasanit ditën e sotme është mbajtur seanca ku do të merret masa e sigurisë për dy mjekët të cilët u arrestuan për vdekjen e 25-vjeçares në Maternitetin e Elbasanit pas lindjes. Familjarët e Rexhinës, me foshnjën vetëm disa ditësh kanë protestuar para dyerve të gjykatës, ndërkohë që mbahej seanca.
“Të mendojnë vetëm një gjë kur të mbushi kjo goca ime 1 vjeç, a do e festoj unë ditëlindjen. A do ia festojmë dot një ditëlindje. Nuk do ia festojmë dot se na kujtohet ngjarja tjetër.”-u shpreh burri i të ndjerës.
Janë të paktën 30 familjarë që protestojnë para Gjykatës, ku edhe pritet të merret vendimi për dy mjekët e arrestuar, Nikollaq Thano dhe Mehmet Ibaj.
Kardiologu Ibaj dhe reanimatori Thano u arrestuan me akuzën e mjekimit të paligjshëm, ku si pasojë humbi jetën 25-vjeçarja Rexhina Debrova , një orë pas lindjes.
Në reagimin e parë qendra spitalore e Elbasanit tha se Rexhina Debrova pësoi një komplikacion të rëndë, të ashtuquajtur infarkt mushkërie.
Ndërkohë priten edhe rezultatet e autopsisë për shkakun zyrtar të vdekjes. Familjarët akuzojnë mjekët për neglizhencë.
